tujh but ka huun main barahman kartar ki saugand hai
japta huun maala yaar ki zunnar ki saugand hai
banka husn sun kar tira khuban ne khaya pech-o-tab
ai nuk-palak tujh chehra-e-bal-dar ki saugand hai
khuban ki khubi hai khizan teri bahar aange sada
ashiq kuun ai gulfam tujh rukhsar ki saugand hai
rakhta huun tujh suun chashm ye dil ai mah-e-nur-e-nazar
aa ke khabar ik roz mujh bimar ki saugand hai
dariya-e-vahdat men tire ai gauhar-e-yakta-e-husn
paaya nahin saani tira sansar ki saugand hai
bin haar aae gul-rukhan tere gale padne katin
jiita to baare husn ke mizmar ki saugand hai
sharmindagi suun ja chhupaya quvvat apni kaan men
sun kar dur-afsani tiri guftar ki saugand hai
shamshir-e-abru bandh kar aaya sipahi nain ka
do tok dil hain ashiqan talvar ki saugand hai
sehn-e-chaman men gul-badan tan-zeb kiin tujh jaama kuun
nain sukh hai tera dekhna didar ki saugand hai
tujh hijr men dil ki fughan suun aankh naiin lagti kabhi
kamkhvab hai makhmal mira shab-e-tar ki saugand hai
ushshaq kuun rukhsat kiya de paan khirad ka yaar ne
rota hai nis din ‘mubtala’ ghar-bar ki saugand hai