Poet
jazba-e-shauq ne yuun dad-e-vafa paa.i hai
khinch ke manzil mire qadmon men chali aa.i hai
aaj tak miT na saki mathe se sajdon ki ḳhalish
ek muddat se tire dar pe jabin-sa.i hai
aa.ina toḌ ke hathon men liye baiThe hain
ibrat-angez ye anjam-e-ḳhud-ara.i hai
aap aa.en na sahi mujh ko bula.en na sahi
aap ki yaad rafiq-e-shab-e-tanha.i hai
mehrban vo hain to aghyar pareshan kyon hain
meri aur un ki to barson ki shanasa.i hai
koi naghma koi sangit koi giit nahin
zindagi dard men Duubi hui shahna.i hai
jin ko inkar tha ab vo bhi to kahte hain ‘habab’
tere ash.ar men gahra.i hai gira.i hai
Leave a Reply