Shmashad Shad
tamam ḳhushiyan tamam sapne ham ek duuje ke naam kar ke
nibha.en ulfat ki saari rasmen vafaon ka ehtimam kar ke
na duur dil se kabhi tu jaana dil-o-jigar men maqam kar ke
piyala-e-ishq ulaT na dena ai saqiya mai-ba-jam kar ke
rahi na mujh men sakat zara bhi ki zulm tere sahun musalsal
milega kya tujh ko ai sitamgar ghamon ka yuun azhdaham kar ke
main in ki nazron ke tiir kha kar taḌap raha huun yahan pe lekin
vo kitne be-fikr lag rahe hain sukun mera haram kar ke
miTani hai jo dilon ki duuri to falsafa hai ye azmuda
charagh-e-ulfat jala.en ham tum dilon ki nafrat ko raam kar ke
masarraton ke husul ka hai jahan men bas ik yahi tariqa
ki sadgi se nibah kar lo talab ke jin ko ghulam kar ke
jahan-e-dil ki is iztirari se bahar aa kar chalo chalen ‘shad’
ḳhushi ki mahfil ko phir saja.en udasiyon ko haram kar ke
Leave a Reply