ḳhizan se manus ho chuke hain nahin ḳhabar kuchh bahar kya hai
taḌap ki lazzat hai jin ko hasil nazar men un ki qarar kya hai
bachega kab tak gharib insan havadis-e-gardish-e-zaman se
hava ke jhonkon men jal sakega charagh ye e’tibar kya hai
qarib ho kar bhi duur hain jaise ek dariya ke do kinare
yunhi gulistan men rah ke bhi ham nahin hain vaqif bahar kya hai
chaman ke ho kar jo ji rahe hain ḳhizan hai rashk-e-bahar un ki
parastish-e-gulsitan hi Thahri to farq-e-ghuncha-o-ḳhar kya hai
nashat-e-vasl-o-sharab-e-didar par jo kam-zarf mutma.in hain
unhen koi kis tarah bata.e ta.ayyush-e-intizar kya hai
ḳhuda-ra ‘altaf’ mujh se ahbab meri tanha.iyan na chhinen
ghamon ke hote hue kisi ko zarurat-e-gham-gusar kya hai
Leave a Reply