kam hi hote hain muqaddar ke sikandar chehre
kitne murjha.e hain in chehron ke andar chehre
ahl-e-kashti ko to sahil ke hi ḳhvab aate hain
takta rahta hai safinon ke samundar chehre
qahr kya TuuT paḌa raat ko us basti par
jale jhulse jo nazar aate hain ghar ghar chehre
dil men ik jalta hua tiir utar jaata hai
jab ghaḌi bhar men badal jaate hain tevar chehre
ye nahin sochte qatil bhi to ho sakte hain
chand ke bhes men tarik se bad-tar chehre
asman aur zamin par to nahin hain ‘ḳhanda’
teri tasvir ke chehre ke barabar chehre
Leave a Reply