Siraj Aurangabadi
hijr ki aag men azaab men na de
misl-e-simab iztirab na de
sandali husn hai tira darkar
dard-e-sar kuun mire gulab na de
bas tira daur-e-chashm ai saaqi
hosh khone mujhe sharab na de
zahid-e-khushk kuun sharab na de
aag de khar-o-khas ko aab na de
apne maron ko mat pareshan kar
zulf-e-mushkin kuun pech-o-tab na de
ashiqon kuun hai lazzat-e-dushnam
har kamine kuun ye khitab na de
kis ne ai bahr-e-husn tujh kuun kaha
ki kisi tishna-lab kuun aab na de
kaam jahil ka hai sukhan-chini
ai ‘siraj’ us kuun tu javab na de
Leave a Reply