saliqa itna to ai shauq-e-ḳhush-kalam aa.e
unhin ki baat ho lekin na un ka naam aa.e
ḳhirad bhi gosh-bar-avaz-e-vaqt thi lekin
payam jitne bhi aa.e junun ke naam aa.e
na chal saka koi meri nigah-e-shauq ke saath
tumhare jalve bhi aa.e to chand gaam aa.e
na jaane husn-e-haqiqat ki jalva-gah se kyuun
fasane jitne bhi aa.e vo na-tamam aa.e
kisi ne sub.h sanvari kisi ne shaam apni
miri nazar ke ujale sabhon ke kaam aa.e
Leave a Reply