sharminda unhen aur bhi ai mere ḳhuda kar
dastar jinhen di hai unhen sar bhi ata kar
luuTa hai sada jis ne hamen dost bana kar
ham ḳhush hain usi shaḳhs se phir haath mila kar
Dar hai ki na le jaa.e vo ham ko bhi chura kar
ham laa.e hain ghar men jise mehman bana kar
ik mauj dabe paanv ta.aqub men chali aa.i
ham ḳhush the bahut ret ki divar bana kar
ham chahen ki mil jaa.en hamen Dher se moti
siḌhi kisi pur-haul samundar men laga kar
darkar ujala hai magar sahme hue hain
kar de na andhera koi barud jala kar
le is ne tira kasa-e-jan toḌ hi Daala
ja kucha-e-qatil men ‘qatil’ aur sada kar
Leave a Reply