agar tujh se huun to phir aur kya huun
main kis jaisa huun kis kis se juda huun
mujhe ma.alum hai kitna bura huun
ye kya kam hai ki apna aa.ina huun
koi divar si TuuTi hai shayad
main andar hi kahin girne laga huun
kabhi to samne a.unga apne
ki apni raah men kab se khaḌa huun
mujhe ehsas ne ghera hua hai
main apne-ap apna da.era huun
ye mera haath kis ke haath men hai
ye kis ke paanv hain jin par khaḌa huun
mire alfaz patthar ho ga.e hain
main apne haath se zaḳhmi hua huun
ḳhud apne-ap ko avaz de kar
na jaane ‘ashk’ kis ko DhunDhta huun
Leave a Reply