Tabish Dehlvi
‘tabish’ havas-e-lazzat-e-azar kahan tak
rahat se ye gham phir bhi mire yaar kahan tak
har roz ik avaza anal-haq ka laga.en
dekhen to ki hai silsila-e-dar kahan tak
har raste se manzil-e-hasti hai bahut duur
ja.ega mire saath gham-e-yar kahan tak
haan ta.ana-e-aghyar ke nashtar hi se khul jaa.e
ik zaḳhm rahega lab-e-guftar kahan tak
hain is ke ta.alluq se aziiz ahl-e-jahan bhi
le ja.egi aḳhir havas-e-yar kahan tak
a.ina-dar-a.ina dar-a.ina tira husn
hairan hon tire talib-e-didar kahan tak
hoti hi nahin sub.h-e-qayamat bhi numudar
jagenge shab-e-hijr ke bimar kahan tak
phaili hui har samt kaḌi dhuup hai ‘tabish’
ja.ega koi saya-e-divar kahan tak
Leave a Reply