Saulat Zaidi
ḳhayal-e-gardish-e-sham-o-sahar men rahta huun
main ghar men rahte hue bhi safar men rahta huun
main apne jism pe tanqid kar nahin sakta
magar ye sach hai ki miTTi ke ghar men rahta huun
mujhe qayam kahan ab mujhe talash na kar
hai mera naam musafir safar men rahta huun
main ek dard sahi phir bhi miT nahin sakta
sabab ye hai ki dil-e-chara-gar men rahta huun
mujhi se mange hai sailab rasta ‘saulat’
ye janta hai ki miTTi ke ghar men rahta huun
Leave a Reply