Aftab Hussain
fasil-e-shahr-e-tamanna men dar banate hue
ye kaun dil men dar aaya hai ghar banate hue
nasheb-e-chashm-e-tamasha bana gaya mujh ko
kahin bulandi-e-ayyam par banate hue
main kya kahun ki abhi koi pesh-raft nahin
guzar raha huun abhi rahguzar banate hue
kise khabar hai ki kitne nujum tuut gire
shab-e-siyah se rang-e-sahar banate hue
pate ki baat bhi munh se nikal hi jaati hai
kabhi kabhi koi jhuti khabar banate hue
magar ye dil mira ye tair-e-bahisht mira
utar hi aaya kahin mustaqar banate hue
dilon ke baab men kya dakhl ‘aftab-husain’
so baat phail gai mukhtasar banate hue
Leave a Reply