Nawed Fidaa Sattii
ashk ko ra.egan samajhte ho
tum mira dukh kahan samajhte ho
sach batao phir apne baare men
gar mujhe raz-dan samajhte ho
shab-gazida huun dil-shikasta nahin
aag huun main dhuan samajhte ho
sunte rahte ho kyon tavajjoh se
kya miri dastan samajhte ho
kya samajhte ho tum agar tum bhi
ishq ko imtihan samajhte ho
ghuum kar dekhte ho duniya ko
raz-e-kaun-o-makan samajhte ho
main ‘fida’ huun tumhari ankhon par
aur tum nim-jan samajhte ho
Leave a Reply