gumrahon ka ham-safar rahna bhi achchhi baat hai
raste se be-ḳhabar rahna bhi achchhi baat hai
kuchh na kuchh na-puḳhtagi bhi aadmi ka husn hai
kuchh na kuchh na-mo’tabar rahna bhi achchhi baat hai
jis men sab be-ḳhanuman rahte hon aise shahr men
ghar ka be-divar-o-dar rahna bhi achchhi baat hai
aur bhi kuchh din guzar jaate vahan to ḳhuub tha
us gali men varna mar rahna bhi achchhi baat hai
jangalon men zard patjhaḌ ka safar hai zindagi
is safar ka muḳhtasar rahna bhi achchhi baat hai
ik na ik ḳhvahish ki chingari sulagti rakh ‘zamir’
kuchh phalon ka shaḳh par rahna bhi achchhi baat hai
Leave a Reply