Mohsin Naqvi
jugnu guhar charagh ujale to de gaya
vo ḳhud ko DhunDne ke havale to de gaya
ab is se baḌh ke kya ho virasat faqir ki
bachchon ko apni bhiik ke pyale to de gaya
ab meri soch saa.e ki surat hai us ke gird
main bujh ke apne chand ko haale to de gaya
shayad ki fasl-e-sang-zani kuchh qarib hai
vo khelne ko barf ke gaale to de gaya
ahl-e-talab pe us ke liye farz hai dua
ḳhairat men vo chand nivale to de gaya
‘mohsin’ use qaba ki zarurat na thi magar
duniya ko roz-o-shab ke doshale to de gaya
Leave a Reply