Gujraat Ki Raat

aaj qismat se nazar aai hai barsat ki raat

kya bigad jaega rah jaao yahin raat ki raat

un ki pa-bosi ko jaae to saba kah dena

aaj tak yaad hai vo aap ke gujrat ki raat

jis men salma ke tasavvur ke hain taare raushan

meri ankhon hai vo alam-e-jazbat ki raat

haae vo mast ghata haae vo salma ki ada

aah vo rud-e-chanab aah vo gujrat ki raat

mere siine men idhar zulf-e-muattar ka hujum

aah vo zulf ki avara kharabat ki raat

sath-e-doya pe idhar nashshe men lahrai hui

rang laai hui chhai hui barsat ki raat

uf vo soi hui khoi hui fitrat ki bahar

uf vo mahki hui bahki hui barsat ki raat

phir vo arman ham-aghoshi ka jazb-e-gustakh

aah vo raat vo salma se mulaqat ki raat

kyuun na un donon pe mitne ki ho hasrat akhtar

uf vo us raat ki baat aah vo us baat ki raat

Leave a Comment