Abbas Dana
vafadari pe de di jaan ghaddari nahin aai
hamare khuun men ab tak ye bimari nahin aai
khuda ka shukr sohbat ka asar hota nahin ham par
adakaron men rah kar bhi adakari nahin aai
amir-e-shahr ho kar bhi nahin koi tiri izzat
tire hisse men ghairat aur khuddari nahin aai
hamari dars-gahon ki nizamat aisi bigdi hai
kitaben padh ke bhi bachchon men hushyari nahin aai
lagai aag us ne shahr men itni safai se
ki us ke ghar pe ud ke ik bhi chingari nahin aai
abhi se kis liye bete ko bhejen naukri karne
hamare dast-o-pa men itni lachari nahin aai
main nadani pe apni aaj tak hairan huun ‘dana’
ki duniya ko samajhne ki samajhdari nahin aai
Leave a Reply