Rahi Shahabi
dil ki barbadi ke asar abhi baaqi hain
kuchh shikasta dar-o-divar abhi baaqi hain
chand parvane hi raqsan hain magar sham-e-hazin
shukr kar kuchh tire gham-ḳhvar abhi baaqi hain
chand ghunchon ke jigar si ke rafugar na bano
kitne dil hain jo dil-afgar abhi baaqi hain
vaqt aaya to tah-e-tegh bhi dohra denge
vo fasane jo sar-e-dar abhi baaqi hain
ai mashihao kabhi ghar se nikal kar dekho
kis qadar shahr men bimar abhi baaqi hain
su-e-virana nikal aa.e jo divane to kya
zehn men to dar-o-divar abhi baaqi hain
ḳhatm muusa pe kahan silsila-e-shauq hua
kitne hi talib-e-didar abhi baaqi hain
mere daman ko na dekho sar-e-mizhgan dekho
kis qadar abr-guhar-bar abhi baaqi hain
uqde khulte hi chale jaate hain har roz na.e
ghaliban mahram-e-asrar abhi baaqi hain
uljhanen ham ko bhi darkar hain utni jitne
tujh men ḳham kakul-e-ḳhamdar abhi baaqi hain
tinke tinke pe tiri yurish-e-paiham phir bhi
ashiyan barq-e-sharar-bar abhi baaqi hain
kis men jur.at hai jo phulon pe nazar Daal sake
pasbani ke liye ḳhaar abhi baaqi hain
jo badal sakte hain mai-ḳhane ka dastur-e-kuhan
chand aise bhi to mai-ḳhvar abhi baaqi hain
dekh kar misr ke bazar ki raunaq ‘rahi’
dil ye kahta hai ḳharidar abhi baaqi hain
Leave a Reply