aadat se un ki dil ko ḳhushi bhi hai gham bhi hai
ye lutf hai sitam bhi hai uzr-e-sitam bhi hai
ulfat mujhe jatate ho dil men bhi dard hai
rone ka munh banate ho ankhon men nam bhi hai
is but ka vasl tha to ḳhuda.i ka aish tha
ye jante na the ki zamane men gham bhi hai
taskin mere dil ki aur us bevafa ka qaul
dil men fareb bhi hai labon par qasam bhi hai
ab aao mil ke so rahen takrar ho chuki
ankhon men niind bhi hai bahut raat kam bhi hai
naumidi bhi hai vasl se us ke umiid bhi
kuchh dard-e-dil badha bhi hai kuchh ranj kam bhi hai
ye baat gar na ho to kare kaun hausla
milna kisi ka sahl bhi hai aur alam bhi hai
jaata hai shak bhi kar gaya hai vahm men vo shoḳh
kuche men ghair hi ke nishan-e-qadam bhi hai
baham tapak bhi hain kabhi ranjishen bhi hain
lutf-o-karam bhi hai kabhi jaur-o-sitam bhi hai
aa jaaen vo magar mujhe aata nahin yaqin
qasid ka jo hai qaul vo ḳhat men raqam bhi hai
bigde hue hain aaj ḳhuda ḳhair hi kare
kuchh bal bhi hai jabin pe kuchh abru pe ḳham bhi hai
mar jaate ham to kab ke ajal dekhti hai tu
fursat kisi ke gham se hamen koi dam bhi hai
kahne ko do makan hain kiin to hai ek hi
bait-us-sanam hai jo vahi bait-ul-haram bhi hai
yuun kah ke bhuul jaana ye ḳhu aap hi ki hai
mujh ko vo yaad ahd bhi hai vo qasam bhi hai
jab kuchh kahun to kahte hain ye phir sununga main
phir aisa koi vaqt bhi hai koi dam bhi hai
kaisa visal o hijr agar fahm hai ‘nizam’
har haal men juda bhi hai vo aur baham bhi hai