Ye Bhi Shayad Tera Eajaz-E-Nazar Hai Ai Dost

Wali Alam Shaheen

ye bhi shayad tira e.ajaz-e-nazar hai ai dost

sho.ala-e-dard mujhe ik gul-e-tar hai ai dost

teri avaz to sahra men bhaTak jaati hai

kis taraf ja.un main tu jaane kidhar hai ai dost

haa.e ye be-sar-o-samani-o-be-tartibi

zindagi kya kisi mai-ḳhvar ka ghar hai ai dost

kitne tufanon ko sar karti hai ik sham-e-vafa

aur vo sham-e-vafa dard-e-jigar hai ai dost

gar ho ḳhvabida to patthar ke siva kuchh bhi nahin

jaag jaa.e jo yahi dil to sharar hai ai dost

yuun to gham ziist ko be-rang bana deta hai

dil-jalon ka yahi sarmaye magar hai ai dost