khirad vaalo junun valon ke viranon men aa jaao
dilon ke baagh zakhmon ke gulistanon men aa jaao
ye daman o gareban ab salamat rah nahin sakte
abhi tak kuchh nahin bigda hai divanon men aa jaao
sitam ki tegh khud dast-e-sitam ko kaat deti hai
sitam-rano tum ab apne aza-khanon men aa jaao
ye kab tak sard lashen be-hisi ke barf-khanon men
charagh-e-dard se raushan shabistanon men aa jaao
ye kab tak sim-o-zar ke jangalon men mashk-e-khun-khvari
ye insanon ki basti hai ab insanon men aa jaao
kabhi shabnam ka qatra ban ke chamko lala-o-gul par
kabhi dariyaon ki surat bayabanon men aa jaao
hava hai sakht ab ashkon ke parcham ud nahin sakte
lahu ke surkh parcham le ke maidanon men aa jaao
jarahat-khana-e-dil hai talash-e-rang-o-nikhat men
kahan ho ai gulistano garebanon men aa jaao
zamana kar raha hai ehtimam-e-jashn-e-bedari
gareban chaak kar ke shoala-damanon men aa jaao
Leave a Reply