Khaleel Rampuri
naam is allah ke bande ka bhi rusva.i men hai
jo samundar ki tarah se apni gahra.i men hai
shaḳh se patta bhi uḌta hai parinde ki tarah
zindagi ki koi chingari tamanna.i men hai
dhuup ka dariya umaD aata hai jab chaḌhta hai din
koi aisi lahr kya us ki bhi angḌa.i men hai
jab havaon men aḌega sab pata lag ja.ega
jhiil niile asman ki kitni gahra.i men hai
chhoḌ jaati hai hava bhi naqsh apne ḳhaak par
sochta huun tu kahan par jalva-ara.i men hai
Duub jaate hain manazir Dubte suraj ke saath
sach kaha karta tha vo bhaa.i ki jaan bhaa.i men hai
lahlahati ḳhaak ko dekha to kya dekha miyan
us ko dekha chahiye jo us ki ra.ana.i men hai
koi darvaze ki dastak kaan men paḌti nahin
but bana baiTha huun ghar men dhyan shahna.i men hai
ghere rahta hai mujhe logon ki avazon ka shor
vo akela dekh kar kahte hain tanha.i men hai
uḌte tayyare ki khiḌki se zara sa jhank le
itne hangamon-bhari duniya bhi tanha.i men hai
ham kisi shishe ko apne munh se patthar kyuun kahen
jis ka jo kirdar hai vo us ki goya.i men hai
dosto kya puchhte ho haal is ke gaanv ka
aa.ina lipTa hua talab ki kaa.i men hai
uTh rahi thiin duur tak paani ki divaren ‘ḳhalil’
ham ye samjhe naqs koi apni bina.i men hai
Leave a Reply