vo pairahan-e-jan men jaan hajla-e-tan men
huun vahm-e-judai se ajab ranj-o-mehan men
maqsud ziyarat hai agar kaaba-e-dil ki
ho garm-e-safar nahiya-e-mulk-e-vatan men
vo qamat-e-dilkash hai ajab fitna-e-alam
chhupta hi nahin pairahan-e-naud-kuhan men
ai shama baha ashk chhupa raz-e-mohabbat
khakistar-e-parvana hai betab lagan men
shorish miri beja hai na fariyad nikammi
raunaq hai zara nala-e-bulbul se chaman men
tasir ho kya khaak jo baton men ghadat ho
kuchh baat nikalti hai to be-sakhta-pan men
kam-tar hai do o daam se insan ba-maratib
har dam jo taraqqi na kare chal-chalan men
huun main to vahi moatakif-e-gosha-e-uzlat
halanki mira rekhta pahuncha hai deccan men
ye sach hai ki sauda bhi tha ustad-e-zamana
meri to magar ‘mir’ hi tha sher ke fan men
Leave a Reply