Wahshat Raza Ali Kalkatvi
lagao na jab dil to phir kyuun lagavaT
nahin mujh ko bhati tumhari banavaT
paḌa tha use kaam meri jabin se
vo hangama bhuli nahin teri chaukhaT
ye tamkin hai aur lab hon jan-e-tabassum
na khul jaa.e ai shoḳh teri banavaT
main dhoke hi khaya kiya zindagi men
qayamat thi us ashna ki lagavaT
Thikana tira phir kahin bhi na hoga
na chhuTe kabhi ‘vahshat’ us but ki chaukhaT
Leave a Reply