nit-na.e rang men nikalta huun
apne ḳhvabon ke saath chalta huun
taare apne safar men rahte hain
aur main apni raah chalta huun
gumrahi raah ḳhud nikalti hai
na.e raston pe jab nikalta huun
duur rahta huun shah-rahon se
aur pagDanDiyon pe chalta huun
paanv apne hain laghzishen apni
ḳhud hi girta huun ḳhud sambhalta huun
barf rahta huun sard lamhon men
dhuup ke saath bah nikalta huun
main hi qaus-e-quzah men huun ‘betab’
mausamon men bhi main badalta huun
Leave a Reply