Aawara Sajde

ik yahi soz-e-nihan kul mira sarmaya hai

dosto main kise ye soz-e-nihan nazr karun

koi qatil sar-e-maqtal nazar aata hi nahin

kis ko dil nazr karun aur kise jaan nazr karun

tum bhi mahbub mire, tum bhi ho dildar mire

ashna mujh se magar tum bhi nahin, tum bhi nahin

khatm hai tum pe masiha-nafasi, charagari

mahram-e-dard-e-jigar tum bhi nahin tum bhi nahin

apni laash aap uthana koi asan nahin

dast-o-bazu mire nakara hue jaate hain

jin se har daur men chamki hai tumhari dahliz

aaj sajde vahi avara hue jaate hain

dard-e-manzil thii, magar aisi bhi kuchh duur na thi

le ke phirti rahi raste hi men vahshat mujh ko

ek zakhm aisa na khaya ki bahar aa jaati

daar tak le ke gaya shauq-e-shahadat mujh ko

raah men tuut gae paanv to maalum hua

juz mire aur mira rah-numa koi nahin

ek ke baad khuda ek chala aata tha

kah diya aql ne tang aa ke khuda koi nahin

Leave a Comment