Ada Hai Khwab Hai Taskin Hai Tamasha Hai

ada hai khvab hai taskin hai tamasha hai

hamari aankh men ik shakhs be-tahasha hai

zara si chaae giri aur daagh daagh varaq

ye zindagi hai ki akhbar ka tarasha hai

tumhara bolta chehra palak se chhu chhu kar

ye raat aina ki hai ye din tarasha hai

tire vajud se bara-dari damak utthi

ki phuul pallu sarakne se irtiasha hai

main be-zaban nahin jo bolta huun likh likh kar

miri zaban tale zahr ka batasha hai

tumhari yaad ke charkon se lakht lakht hai ji

ki khanjaron se kisi ne badan ko qasha hai

jahan bhar se jahan-gard dekhne aaen

ki putliyon ka mire mulk men tamasha hai

Leave a Comment