Zeb Ghauri
marne ka sukh jiine ki asani de
andata kaisa hai aag na paani de
is dharti par hariyali ki jot jaga
kaale megha paani de gardani de
band aflak ki divaron men rauzan kar
koi to manzar mujh ko imkani de
mere dil par khol kitabon ke asrar
meri aankh ko apni saaf nishani de
arz o sama ke pas-manzar se samne aa
dil ko yaqin de ankhon ko hairani de
mere hone mere na hone men kya hai
maut ko mafhum is hasti ko ma.ani de
barakat de din pherne vaali duaon ko
raat ko koi ḳhush-tabir kahani de
TuTti rahti hai kachche dhage si niind
ankhon ko ThanDak ḳhvabon ko girani de
mujh ko jahan ke saton sukh dene vaale
dena hai to koi daulat la-fani de
tujh se juda ho kar to main mar ja.unga
mujh ko apna sar ai dost nishani de
ik ik patthar raah ka ‘zeb’ haTata chal
pichhe aane valon ko asani de
Leave a Reply