vaqt se pahle daraḳhton pe samar aane lage
raat aa.i bhi nahin ḳhvab-e-sahar aane lage
main ne pahla hi qadam rakkha hai dariya men abhi
ḳhair-maqdam ke liye kitne bhanvar aane lage
kya ḳhata ho ga.i sarzad main isi soch men huun
sang ke badle miri samt guhar aane lage
is liye zill-e-ilahi se ḳhafa hain raten
un ke aivan men kyuun ḳhak-basar aane lage
aap kuchh aur hain ashiq ise kahte hain miyan
jis ko har chiiz men mahbub nazar aane lage
ḳhair mangen kisi dushman ke liye ab ‘alam’
ain mumkin hai duaon men asar aane lage
Leave a Reply