Ehsan Danish
jabin ki dhuul jigar ki jalan chhupa.ega
shuru-e-ishq hai vo fitratan chhupa.ega
damak raha hai jo nas nas ki tishnagi se badan
is aag ko na tira pairahan chhupa.ega
tira ilaaj shifa-gah-e-asr-e-nau men nahin
ḳhirad ke ghaav tu divana-pan chhupa.ega
hisar-e-zabt hai abr-e-ravan ki parchha.in
malal-e-ruh ko kab tak badan chhupa.ega
nazar ka fard-e-amal se hai silsila darkar
yaqin na kar ye siyahi kafan chhupa.ega
kise ḳhabar thi ki ye daur-e-ḳhud-gharaz ik din
junun se qimat-e-dar-o-rasan chhupa.ega
tira ghubar zamin par utarne vaala hai
kahan tak ab ye bagula thakan chhupa.ega
khulega bad-e-nafas se jo ruḳh pe nil-kanval
use kahan tira ujla badan chhupa.ega
tire kamal ke dhabbe tire uruuj ke daagh
chhupa.ega to koi ahl-e-fan chhupa.ega
jise hai faiz miri ḳhanqah se ‘danish’
vo kis tarah mira rang-e-suḳhan chhupa.ega
Leave a Reply