saloni shaam ke angan men jab do vaqt milte hain
bhaTakte ham se un sayon men kuchh aadhe adhure hain
samundar hai hamare samne maghrur-o-ḳhud-sar sa
hamen ik pul bana kar fasle sab paar karne hain
andheron se ujalon tak ujalon se andheron tak
sada gardish hi gardish hai kahan jaane vo pahunche hain
zamin ke phuul sone aur chandi se nahin khilte
kisi mehnat ki ḳhushbu se sabhi anchal mahakte hain
vahi hain saanp vishkanya ko Das kar palne vaale
miri nagri ko rah rah kar vo ab bhi zahr dete hain
har ik ehsas ki pahchan ḳhatt-o-ḳhal kho baiThi
vo apne aap men Duube hue gum-sum se rahte hain
Leave a Reply