Be-Bulae Hue Jaana Mujhe Manzur Nahin

be-bulae hue jaana mujhe manzur nahin

un ka vo taur nahin mera ye dastur nahin

lan-tarani ke ye maani hain baja hai daava

dekhe be-parda tujhe koi ye maqdur nahin

vo kahan taaj kahan takht kahan maal o manal

qabil ab bhiik ke bhi kasa-e-faghfur nahin

be-ibadat na khuda bakhshega subhan-allah

aisi firdaus se ham guzre ki mazdur nahin

main vo mai-kash huun na rakkhun kabhi bhule se qadam

koi kah de ye agar khuld men angur nahin

dam-ba-dam uthte hain tufan jo ‘barq’ ashkon ke

nuuh ka vaqt nahin aankh hai tannur nahin

Leave a Comment