Log Bante Hain Hoshiyar Bahut

Ameer Qazalbash

log bante hain hoshiyar bahut

varna ham bhi the ḳhaksar bahut

ghar se be-tesha kyuun nikal aa.e

raste men hain kohsar bahut

tujh se bichhḌe to ai nigar-e-hayat

mil ga.e ham ko gham-gusar bahut

haath shal ho ga.e shanavar ke

ab ye dariya hai be-kanar bahut

ham faqiron ko kam nazar aa.e

is nagar men the shahryar bahut

us ne majbur kar diya varna

ham ko ḳhud par tha iḳhtiyar bahut

ham hi apna samajh rahe the use

ho ga.e ham hi sharmsar bahut