Ajmal Ajmali
har ghaḌi rahta hai ab ḳhadsha mujhe
pi na jaae vaqt ka dariya mujhe
go haqiqat tha magar ai zindagi
ḳhvab sa tu ne sada dekha mujhe
jab bhi milta huun vahi chehra liye
bad-dua deta hai aina mujhe
chhoḌ aaya huun sulagti ret men
jaane kya kahta ho naqsh-e-pa mujhe
us ke dil men ḳhud vafa na-paid thi
dosti ki bhiik kya deta mujhe
dubti bujhti hui avaz huun
saath vaalo ghaur se sunna mujhe
Leave a Reply