Mujhe Jina Nahin Aata

main jaise dard ka mausam

ghata ban kar jo bas jaata hai ankhon men

dhanak ke rang khushbu nazr karne ki tamanna le ke jis manzar talak jaun

siyah ashkon ke gahre kohr men Duuba hua paun

men apne dil ka sona

pyaar ke moti

tarasti aarzu ke phuul jis dar par sajata huun

vahan jaise makin hota nahin koi

bana huun ek muddat se sada-e-bazgasht aisi

jo divaron se takrae

hirasan ho ke laut aae

dhadakte dil ke sune-pan ko suuna aur kar jaae

main apne aap ko sunta huun

apne aap ko chhuta huun

apne aap se milta huun khvabon ke suhane aina-ghar men

to mera aks mujh par muskurata hai

ye kahta hai

saliqa tujh ko jiine ka na aana tha nahin aaya

sadaen pattharon ki tarah mujh par

mere khvabon ke bikharte aina-ghar par barasti hain

udhar taara idhar jugnu

kahin ik phuul ki patti kahin shabnam ka ik aansu

bikhar jaata hai sab kuchh ruuh ke sunsan sahra men

main phir se zindagi karne ke arman men

ik ik reze ko chunta huun sajata huun nai murat banata huun

dhanak ke rang khushbu nazr karne ki tamanna men qadam aage badhata huun

to ik be-nam gahri dhund men sab Duub jaata hai

kisi se kuchh shikayat hai na shikva hai

ki main to dard ka mausam huun

apne aap men palta huun apne aap men jiita huun

apne ansuon men bhigta huun muskurata huun

magar sab log kahte hain

tujhe jiina nahin aata

Leave a Comment