be-ḳhudi men munh se jo nikla suḳhan sabit hua
aql se behtar mira divana-pan sabit hua
morid-e-ilzam Thahraya gaya ham ko magar
vaj.h-e-rusva.i nizam-e-anjuman sabit hua
ghair chehre ajnabi mahaul mub.ham se nuqush
main jahan pahuncha vahi mera vatan sabit hua
ek lamhe ko baharon se hue the ham-kalam
ek muddat men hamara pairahan sabit hua
kis qadar nazuk thi vo ehsas ki manzil ki jab
doston ka mashvara bhi dil-shikan sabit hua
Leave a Reply