Jameeluddin Aali
umr bhar ba-asani bar-e-gham uThane se
un pe e’tibar aaya ḳhud ko azmane se
is hujum men tujh ko kya ḳhabar hui hogi
kis ko kya ta.alluq tha tere astane se
yuun salam aane par ik ḳhalish si hoti hai
kaash ham ko bulvate vo kisi bahane se
haan to un ki ḳhatir se kyuun taravashen karte
jis tarah vahan guzri kah ga.e zamane se
jab bhi bazm-e-alam men koi fitna uThta hai
ya tumhari mahfil se ya gharib-ḳhane se
silsila yahi hoga ruḳh badalte ja.enge
main tiri haqiqat se tu mire fasane se
Leave a Reply