aate hain pahle lab pe savalat ḳhud-baḳhud
phir ham ko sujhte hain javabat ḳhud-baḳhud
sochon men apne aap utarti hai raushni
jalti hai dil men mash.al-e-jazbat ḳhud-baḳhud
jab tak na lenge fahm-o-farasat se kaam ham
badlegi kaise surat-e-halat ḳhud-baḳhud
qasr-e-tasavvurat men jab se muqim hain
hoti hai roz un se mulaqat ḳhud-ba-ḳhud
tanvir jin ki hai mire ik ek lafz men
nazil hui hain mujh pe vo ayat ḳhud-ba-ḳhud
chamka hai kis ki yaad ka suraj ḳhayal men
raushan hua hai shahr-e-ḳhayalat ḳhud-ba-ḳhud
‘shahid’ isi ka naam hai taufiq-e-aizdi
nikla zaban se harf-e-munajat ḳhud-ba-ḳhud
Leave a Reply