Yusuf Zafar
shahr lagta hai bayaban mujhe
kahin milta nahin insan mujhe
main tira naqsh-e-qadam huun ai dost
apne andaz se pahchan mujhe
main tujhe jaan samajh baiTha huun
apne saa.e ki tarah jaan mujhe
tu kahan hai ki tire parde men
liye phirta hai tira dhyan mujhe
teri ḳhushbu ko saba laa.i thi
kar ga.i aur pareshan mujhe
sar-o-saman-e-do-alam huun main
kyuun kaho be-sar-o-saman mujhe
meri hasti tira afsana thi
maut ne de diya unvan mujhe
dil ki dhaḌkan pe guman hota hai
DhunDhta hai koi har-an mujhe
main bhi a.ina huun tera lekin
tu ne dekha kabhi hairan mujhe
un ki nisbat ka karishma hai ‘zafar’
kahte hain yusuf-e-kan.an mujhe
Leave a Reply