abbas-tabish

Ishq Ki Jot Jagane Mein Badi Der Lagi

ishq ki jot jagane men badi der lagi

saae se dhuup banane men badi der lagi

main huun is shahr men takhir se aaya hua shakhs

mujh ko ik aur zamane men badi der lagi

ye jo mujh par kisi apne ka guman hota hai

mujh ko aisa nazar aane men badi der lagi

ik sada aai jharoke se ki tum kaise ho

phir mujhe laut ke jaane men badi der lagi

bolta huun to mire hont jhulas jaate hain

us ko ye baat batane men badi der lagi

mere arse men koi sahl na tha kar-e-sukhan

ek do sher kamane men badi der lagi

main sar-e-khak koi ped nahin tha ‘tabish’

is liye paanv jamane men badi der lagi

More Poems

Leave a Comment