Khwahan Tere Har Rang Mein Ai Yar Hamin The

Haidar Ali Aatish

khvahan tire har rang men ai yaar hamin the

yusuf tha agar tu to kharidar hamin the

be-dad ki mahfil men saza-var hamin the

taqsir kisi ki ho gunahgar hamin the

vaada tha hamin se lab-e-bam aane ka hona

saaye ki tarah se pas-e-divar hamin the

kanghi tiri zulfon ki hamin par thi muqarrar

aina dikhate tujhe har baar hamin the

neamat thi tire husn ki hisse men hamare

tu kan-e-malahat tha kharidar hamin the

sauda-zada zulfon ka na tha apne siva ek

azad do-alam tha giraftar hamin the

tu aur ham ai dost the yak-jan do qalib

tha ghair siva apne jo tha yaar hamin the

bimar-e-mohabbat tha siva apne na koi

ik mustahiq-e-sharbat-e-didar hamin the

be apne bahalti thi tabiat na kisi se

dil-soz hamin the tire gham-khvar hamin the

ik jumbish-e-mizhgan se ghash aata tha hamin ko

do nargis-e-bimar ke bimar hamin the

jab chahte the lete the aghosh men tum ko

majbur se rah jaate the mukhtar hamin the

ham sa na koi chahne vaala tha tumhara

marte the hamin jaan se bezar hamin the

bad-nam mohabbat ne tiri ham ko kiya tha

rusva-e-sar-e-kucha-o-bazar hamen the

dil thokaren khata tha na har gaam kisi ka

ik khaak men milte dam-e-raftar hamin the

bhadkane se ‘atish’ ko jalane lage ya to

altaf-o-inayat ke saza-var hamin the