ai sub.h-e-umid der kya hai
ab kitne diyon ka fasla hai
ab kitni hai der raushni men
ab kitni shabon ka marhala hai
ham hijr ki raat ke musafir
is dasht se ham ko kya mila hai
vo ḳhvab to jal-bujhe hain saare
vo ḳhema to raakh ho chala hai
ab kaise charagh kya charaghan
jab saara vajud jal raha hai
bahar bhi vahi faza hai saari
indar bhi mire vahi ḳhala hai
ik dil hai aur itni qatl-gahen
jo raah chalo vo karbala hai
vo daur hai ye ki sunne vaala
har lafz ko chhu ke dekhta hai
itne jo azaab utar rahe hain
is shahr ko kis ki bad-dua hai
Leave a Reply