nazar aane lage ho mehrbāñ se
ye andāz aa ga.e tum meñ kahāñ se
kise raas aa.egī terī ḳhudā.ī
agar ham uTh ga.e bazm-e-jahāñ se
bharam khul jā.egā tere karam kā
agar kuchh kah diyā ham ne zabāñ se
kahāñ se aa gayā ye abr-e-rahmat
hameñ kuchh kaam thā barq-e-tapāñ se
jise dekho vahī matlab kā banda
mohabbat uTh ga.ī rū-e-jahāñ se
kareñge zikr tere husn kā bhī
agar fursat milī kār-e-jahāñ se
taḌaptī phir rahī hai barq ab tak
ulajh baiThī thī mere āshiyāñ se
yūñhī rotī nahīñ ‘sābir’ ko duniyā
use bhī ishq thā ahl-e-jahāñ se