Kashfi Lucknavi
yahi hua hai jo us rahguzar se guzre hain
hazar hashr ke manzar nazar se guzre hain
vo rahen aaj bhi naqsh-e-vafa se hain raushan
mizaj-dan-e-mohabbat jidhar se guzre hain
ḳhuda kare na vo guzren kisi ki nazron se
jo sail-e-dard-o-bala mere sar se guzre hain
chhupa.e ankhon men aansu dilon men dard-o-fughan
vafa shanas yunhi tere dar se guzre hain
talash-e-yar men ham kya Daren musibat se
hazar baar rah-e-pur-ḳhatar se guzre hain
khila ga.e hain mohabbat ke phuul kanTon men
tumhare chahne vaale jidhar se guzre hain
dil-o-jigar men ujala hai aaj tak jin ka
kuchh aise jalve bhi ‘kashfi’ nazar se guzre hain
Leave a Reply