Shakeel Shamsi
yaad tum aa.e to phir ban ga.iin badal ankhen
dil ke virane ko karne lagin jal-thal ankhen
meri ankhon ka koi abr se rishta hai zarur
TuuT ke barsi ghaTa jab huiin bojhal ankhen
ḳhvab ko ḳhvab samajhti hi nahin jaane kyuun
DhunDhti rahti hain ik shaḳhs ko pagal ankhen
kaisa rishta hai ta.alluq hai ye kaisa aḳhir
choT to dil pe lagi ho ga.iin ghayal ankhen
shoḳhiyan sharm-o-haya nuur ke saa.e jhelen
umr men pahle-pahal dekhen mukammal ankhen
jis tarah koi ghazal likkhi ho matle.a ke baghair
yuun nazar aati hain akasr bina kajal ankhen
ai ‘shakil’ un se kaho pyaar se vo duur rahen
dard ka bojh na sah pa.engi chanchal ankhen
Leave a Reply