palkon par moti rakkhe hain sochon par sannaTa hai
ta.abiron ka shor bahut hai ḳhvabon par sannaTa hai
a.ankhon se baten karne ka mausam hai ḳhamosh raho
aur to sab kuchh jaa.ez hai yaan lafzon par sannaTa hai
din to ḳhair guzare ham ne hans kar bhi chup rah kar bhi
lekin jab se bichhḌe hain tum se raton par sannaTa hai
shayad ab mausam ke panchhi aa.en to chahkar uḌe
chiḌiyon ke ghar jab se ujḌe peḌon par sannaTa hai
kaun se din hain bachchon ke bin raste suune suune hain
koi zulf nahin lahrati galiyon par sannaTa hai
kis se kah kar halke ho len koi ab milta hi nahin
dil men huuk bahut uThti hai honTon par sannaTa hai
Leave a Reply