kya roz-e-hashr duun tujhe ai dad-gar javab
aamal-name ka to hai peshani par javab
ruk ruk ke hans ke yuun hi to de fitna-gar javab
deta hai aur lutf mujhe tera har javab
kis se misal duun tiri zulf-e-daraz ko
umr-e-tavil-e-khizr hai ik mukhtasar javab
mushkil ke vaqt dil hi se kuchh mashvara karen
kyuun den kisi ko ghair se ham puchh kar javab
karte hain sajda naqsh-e-qadam ko tamam log
hai khana-e-khuda ka tiri rahguzar javab
munkir-nakir puchhte hain daant daant kar
hon muntashir havas to kya de bashar javab
khuld-o-saqar ke biich men hai koi ishq-e-yar
hai pul-sirat ka ye miri rahguzar javab
kyuun sar jhuka raha hai zara aankh to mila
degi mire saval ka teri nazar javab
ghusse men yuun na aao ki ghussa haram hai
tum baat hi se baat ka do soch kar javab
zarron ki tarah khaak men hain ashiqon ke dil
gar tu kare saval to de rahguzar javab
main ne kiya salam to chilman men chhup gae
dar-parda degi ab nigah-e-parda-dar javab
hangama hashr ka sifat-e-gard rah gaya
tere khiram ka na hua fitna-gar javab
kya apne bhole-pan se kahen dam men aae ho
har baat ka jo dete ho ab soch kar javab
kya hoga khaak ho ke sar-e-charkh jaega
ye zer-e-pa saval vo bala-e-sar javab
likkha hai mujh ko ho gaya tera lahu safed
main bhi likhunga khuun se sar phod kar javab
behosh kar ke puchhte ho dil ka muddaa
deta bhi hai huzur kahin be-khabar javab
ghusse se kuchh kahun to vo kis tarah chup rahe
ik baat ka jo shaam se de ta-sahar javab
chitvan se taad jaate hain ‘mail’ ka muddaa
dil men idhar saval hai lab par udhar javab