Owais Ahmad Dauran
ghamgin hain dil-figar hain mere yahan ke log
daman-e-tar-tar hain mere yahan ke log
paida kiya hai jhuTe masihaon ne jise
us dard ke shikar hain mere yahan ke log
kya janiye hain kab se jigar soḳhta magar
insan ke gham-gusar hain mere yahan ke log
gardan agarche ḳham hai ita.at ke bojh se
lekin harif-e-dar hain mere yahan ke log
‘dauran’ inhi ke zaḳhm se phuTegi raushni
maana ki sogvar hain mere yahan ke log
Leave a Reply