phulon ko vaise bhi murjhana hai murjha.enge
khiḌkiyan kholin to sannaTe chale a.enge
laakh ham ujli rakhen shahr ki divaron ko
shahr-name to bahar-hal likkhe ja.enge
raakh rah ja.egi rudad sunane ke liye
ye to mehman parinde hain chale ja.enge
apni laghzish ko to ilzam na dega koi
log thak-har ke mujrim hamen Thahra.enge
aaj jin jag.hon ki tafrih se mahfuz huun main
mere halat mujhe kal vahan pahuncha.enge
raste shaam ko ghar le ke nahin lauTenge
ham tabarruk ki tarah rahon men baT ja.enge
din kisi tarah se kaT ja.ega saḌkon pe ‘shafaq’
shaam phir aa.egi ham shaam se ghabra.enge
Leave a Reply