us ka hal-e-kamar khula hamdam
ham ko mulk-e-adam mila hamdam
hal-e-dil ‘mehr’ ka khula hamdam
dard hamdard-e-dil hua hamdam
valih-e-kakul-e-rasa hamdam
sar-e-sauda ka ho raha hamdam
dard ham ko hua dava hamdam
aur lillah dil dukha hamdam
dil ka hasil ho muddaa hamdam
rahm kar aa idhar ko aa hamdam
allah allah lala-e-kohsar
gul-e-lauh-e-lahad hua hamdam
mausam-e-gul ho koh-e-sahra ho
sar ho sauda ho valvala hamdam
ham ko daura-e-surur vaada-e-vasl
daur hoga mudam ka hamdam
hukm ham ko hua ki gul khaao
vaah vaah aur gul khila hamdam
hoga maalum hal-e-ruh allah
laal-e-dil-dar gar hila hamdam
allah allah ah-e-sard-e-sahar
garm kis kis tarah hua hamdam
kis tarah ka moamla hoga
vasl us ka agar hua hamdam
kis tarah tale-e-adu ho saad
kis tarah ullu ho huma hamdam
ham ko us laal ka dikha aalam
muskura kar lahu rula hamdam
dam-e-kakul ho silsila hamdam
gar sar-e-mu girah ho va hamdam
dil ka vo haal is ka vo aalam
kis ka ho ham ko aasra hamdam
rakho ‘mehr’ us ko likkho aur tarah
daur-e-kilk-e-mudam la hamdam
Leave a Reply